00:40 | 06 ديسمبر 2020
رئيس مجلسي الادارة و التحرير
عبد الفتاح يوسف
نائب رئيس التحرير
شامل دسوقي

خطوات تغيير عنوان الرقم القومي لحدائق أكتوبر أو تغيير مهنة أو تجديد

الخميس 22-10-2020 03:13 م
خطوات تغيير عنوان الرقم القومي لحدائق أكتوبر أو تغيير مهنة أو تجديد
عبد الفتاح يوسف
البوست منقول دون تغيير للافادة   من جروب حدائق أكتوبر اون لاين 
تعديل: مرفق المنشورات الخاصة بالتعليمات وتكاليف الخدمات
أولاً: سعر الاستمارة العادية بـ ٤٥ جنيه في سجل حدائق اكتوبر والبطاقة هتاخد في حدود ٢٥ - ٣٠ يوم عشان تستلمها ومفيش مستعجل، لو عايزها في ١٥ يوم هتروح سجل مدني هرم سيتي، لو عايزها في ٣ ايام هتروح سجل مدني الهرم في اللبيني وهتشتري الاستمارة من هناك مستعجل بـ ١٧٠ جنيه، وفيه رسوم تصوير ١٥ جنيه، ورسوم تعديل العنوان ٥٠ جنيه وأي تعديل الرسوم ٥٠ جنيه ولو أول مرة استخراج بطاقة والسن ١٦ سنة لو عديت ٦ شهور عن السن تدفع ١٠٠ جنيه غرامة.
ثانياً: لتعديل العنوان هتجيب ايصال مرافق، غالبا بيكون ايصال كهربا، عشان ماعندناش حالياً مرافق تانية غيرها، هتروح هرم سيتي تشحن كارت العداد وتاخد الايصال تختمه، والشحن في مكتب تابع للكهربا بس مش في المبنى الاساسي، فيه مكتب بعدهم في منطقة حي الفنانين عند موظف اسمه استاذ عماد، تشحن بأي مبلغ وترجع المبنى الاساسي تختم في الدور التاني غالباً، تاخد بالك وتنبه على الموظف ان الختم يكون واضح عشان موظفة السجل بتركز فيه ومش هتقبله منك لو الكلام اللي على الختم مش واضح.
ثالثاً: هتاخد الاستمارة وتختمها حسب جهة العمل، لو عمل حر مهندس او محامي يبقى من النقابة التابع ليها، لو موظف قطاع خاص لازم ختم التأمينات أو پرينت عشان اثبات الوظيفة في الشركة، لو صاحب عمل هتجيب السجل التجاري والبطاقة الضريبية وپرينت تأمينات.
رابعاً: صورة البطاقة القديمة سواء سارية أو منتهية أو تالفة أو مفقودة وصورة من ايصال المرافق، ولو البطاقة ضايعة هتدفع ٢٥ جنيه قيمة محضر فقد هتعمله جوا في السجل (مش محضر في القسم)، مجرد اجراء روتيني ونموذج بتعمله الموظفة في أقل من دقيقة وهيرفق المحضر مع الاستمارة وياريت يكون معاك اثبات شخصية تاني زي جواز السفر وصورة منه.
خامساً: ترتيب الاجراءات، لو في سجل مدني الهرم عشان تجربتي كانت هناك، لو هتشتري الاستمارة تدخل اول شباك على شمالك، لو خلصت ورق وجاي تقدم هتاخد رقم وتدخل على الشباك اللي على اليمين، هتراجع ورقك وهتوجهك لو فيه حاجة ناقصة، او هتعمل تأشير على الورق عشان تروح تدفع اي غرامات او تأخيرات او تعمل المحضر ودا بيكون عند نفس شباك الاستمارات، والشباك دا هو هو اللي بتستلم منه البطاقة بعد كدة.
سادساً: هترجع للموظفة تاني بعد الدفع والمحضر والذي منه هتأشر آخر تأشيرة وتمضي وتختم وتوجهك لغرفة التصوير، هتروح تديهم الورق وتستنى دورك، تدخل للتصوير هتدفع ٢٠ جنيه وتراجع معاك البيانات الاسم وتاريخ الميلاد، هتتصور وتاخد كعب الاستمارة اللي هتستلم بيه وترجع تستلم بعد ٣ ايام من نفس شباك بيع الاستمارات.
نصايح عامة:
- سجل مدني الهرم في اللبيني مكانه سهل جداً هنكتب على جووجل ماپس هنلاقيه، المشوار مش سخيف واللي معاه عربية هيلاقي مكان يركن بسهولة، ولو مفيش عربية فالمواصلات سهلة وهو بينه وبين اللبيني الرئيسي ناصيتين، والمكتب نفسه مش زحمة خالص.
- اي ورق معاك صوره واحتفظ معاك بنسختين او اكتر عشان ماتفضلش خارج وداخل، حتى ايصال الكهربا خللي معاك صورتين منه.
- استلام البطاقة بعد ٣ ايام بس لا يفضل تروح ۹ صباحا، بعد ١١ أفضل عشان تكون البطاقات وصلت.
- التصوير حالياً اجباري حتى لو بتجدد والبطاقة سارية، حتى لو فكرت تعمل بطاقة تاني يوم هتتصور تاني، هتتصور يعني هتتصور.

تابعنا على فيسبوك

تابعنا على تويتر