جثة يرجح أنها لمصري مدفونة في قبو بالنمسا منذ 25 سنة.. وشرطة فيينا تنشر صورة لوجهه بحثًا عن هويته _ شير يمكن توصل لأهله
في صباح الأحد 8 نوفمبر 2026، نشرت شرطة العاصمة النمساوية فيينا صورة غريبة لراجل في حدود الثلاثين من عمره، ملامحه قريبة من ملامح شباب كتير ممكن تقابلهم في أي شارع مصري.
اقرأ أيضاً
- ارتفاع عدد ضحايا حادث القطار الي ٤ وفيات و ٨٨ مصابا
- وزير التموين يلتقي بعدد من السادة أعضاء مجلسي النواب والشيوخ*
- وزارة الصحة: ارتفاع أعداد مصابي حادث قطار العياط لـ88 مصابا ووفاة 4 ركاب
- رئيس الوزراء ينعى ضحايا حادث قطار الجيزة ويقدم خالص التعازي لأسرهم.. ويكلف: كل الدعم لأسرهم
- الرئيس عبد الفتاح السيسى يتابع حادث قطار العياط ويعزى أسر المتوفين وتوفير الرعايه للمصابين ومحاسبة المقصرين
الصورة دي مرسومة باستخدام تقنيات الطب الشرعي، والراجل اللي فيها محدش يعرف اسمه، ولا اسم أهله، ولا كان بيشتغل إيه، ولا إزاي وصل للنمسا.
اللي الشرطة عرفته عنه بعد تحقيقات طويلة إنه على الأرجح شاب من شمال أفريقيا، وتحديدا من مصر، وإنه اتقتل من حوالي ربع قرن، واتدفن في قبو عمارة سكنية في العاصمة فيينا.
والحكاية بدأت يوم 16 أبريل 2024.
في اليوم ده، كان فيه عمال بيشتغلوا في تجديد مبنى سكني بمنطقة مارجاريتن، الحي الخامس في فيينا.
وأثناء أعمال الترميم في قبو العمارة، اكتشفوا بقايا جثة إنسان مدفونة تحت الأرض.
الجثة كانت ملفوفة داخل أكياس بلاستيكية، وحالتها بتشير إلى إنها موجودة في المكان من سنين طويلة جدًا.
الشرطة وصلت للمكان، وبدأت معاينة الرفات، وسريعًا ظهرت أدلة على إن الراجل ده مات نتيجة جريمة قتل.
وبحسب ما نشرته صحيفة «دير شتاندارد» النمساوية، الجثة كانت من دون رأس، وظهر فيها آثار إصابات بأداة حادة في الذراعين واليدين، رجح المحققين إنها ممكن تكون حصلت أثناء محاولة الضحية الدفاع عن نفسه.
ومن هنا بدأت واحدة من أغرب قضايا القتل القديمة اللي بتحاول شرطة فيينا حلها.
مين الراجل ده؟
مين قتله؟
وإزاي جثته فضلت مدفونة تحت عمارة سكنية كل السنين دي، من غير ما حد يكتشفها؟
المحققين بدأوا يفحصوا الأدلة، ويطابقوا المعلومات المتاحة مع قواعد بيانات المفقودين، وتعاونوا مع جهات شرطية خارج النمسا، لكن مفيش نتيجة وصلت بيهم لاسمه.
وفي ديسمبر 2024، الشرطة نشرت صور الملابس اللي عثر عليها مع الجثة، وكان بينها تريننج أحمر عليه كتابة «VOX MARIS»، على أمل إن حد يفتكر شاب اختفى من زمان وكان بيلبس الملابس دي.
وبرضو مفيش حد قدر يحدد هويته.
التحقيقات العلمية قدرت تحدد شوية تفاصيل عن الراجل المجهول.
كان عمره وقت الوفاة حوالي 30 سنة، وطوله نحو 170 سنتيمتر، وجسمه نحيف، وأسنانه كانت في حالة جيدة.
والأهم إن الفحوص رجّحت إنه من أصول شمال أفريقية، وعلى الأرجح من مصر.
أما الفترة اللي قضاها مدفون تحت العمارة، فقدّرها المحققين بحوالي 25 سنة.
وده معناه إن الجريمة ممكن تكون حصلت قرب سنة 1999، قبل اكتشاف الجثة بربع قرن تقريبًا.
يعني ممكن يكون فيه شاب كان عايش وقتها، ممكن يكون سافر من مصر للنمسا علشان يشتغل أو يدرس أو يبدأ حياة جديدة، واختفى فجأة.
لكن الشرطة لسه متعرفش هو سافر ليه، ولا كان مقيم بشكل دائم في النمسا، ولا حتى إذا كان مصري الجنسية بالفعل.
اللي نعرفه إنه مات مقتول واتدفنت جثته في القبو، وفضلت قصته مجهولة لحد النهارده.
وبعد أكتر من سنتين من اكتشاف الجثة، قررت شرطة فيينا تستخدم وسيلة جديدة.
بالتعاون مع مركز الطب الشرعي بجامعة فيينا الطبية، عمل الخبراء إعادة بناء للأنسجة الرخوة للوجه، اعتمادًا على المعلومات التشريحية المتاحة، علشان يطلعوا بصورة تقريبية للشكل اللي كان ممكن يكون عليه الراجل وهو عايش.
ويوم الأحد 8 نوفمبر 2026، الشرطة نشرت الصورة رسميا، ومعاها صور الملابس مرة تانية.
وأكدت إن الوجه المرسوم مجرد تصور علمي تقريبي، ومش بالضرورة يكون مطابق لملامحه الحقيقية.
وفي تصريحات لهيئة الإذاعة النمساوية ORF، قال المتحدث باسم الشرطة ماركوس ديتريش إن التحقيقات مستمرة، وإن جريمة القتل لا تسقط بالتقادم.
والشرطة لسه بتدور على هوية الضحية، وفي الوقت نفسه بتحاول توصل للشخص أو الأشخاص المسؤولين عن قتله.
النهارده فيه احتمال إن الصورة دي يشوفها شخص مصري أو عربي، ويفتكر قريب أو صديق اختفى في أوروبا من أواخر التسعينيات، وانقطعت أخباره من غير تفسير.
علشان كده شرطة فيينا بتناشد أي شخص عنده معلومات عن شاب اختفى من حوالي 25 سنة، وملامحه أو مواصفاته قريبة من الصورة، إنه يتواصل معاها.
رقم إدارة المباحث الجنائية في فيينا:
0043 1 31310 33800
والبلاغات ممكن تتقدم من غير الكشف عن هوية صاحبها.
الراجل ده بقاله حوالي ربع قرن من غير اسم معروف، ومن غير ما يتعرف مين قتله. والشرطة بتأمل إن صورة واحدة، أو قطعة هدوم قديمة، أو ذكرى عند حد من أهله، تكون بداية حل اللغز.
