وفاء عامر تكشف حقيقة استبعاد منة فضالي لها من أحد الأعمال الفنية.. وتبكي

ردّت الفنانة المصرية وفاء عامر على حقيقة وجود خلاف بينها وبين زميلتها الفنانة منة فضالي، وإذا كانت الأخيرة سببا في استبعادها من أحد الأعمال الفنية، مثلما صرحت في وقت سابق.

وقالت عامر خلال لقائها مع برنامج "كلام الناس": "محدش يقدر يستبعدني غير ربنا سبحانه وتعالى والشغل رزق، وحتى لو فيه وقيعة وأنا زعلانة معاك هل من الشرف إني أستبعدك؟ يعني لو الكلام ده عليا أنا فهل ده من الشرف والأمانة والدين، بالعكس المفروض ما استبعدش حد وأساعده ياكل عيش".

وأشادت بدور فضالي في "جعفر العمدة": "ربنا يزيدها ويكرمها ومش تستبعدني بس لأ تستبعد كل الزملاء، ولو هي استبعدتني فشكرا ليها، وأنا أشدت بها في مسلسل جعفر العمدة وكتبت أنها عاملة خطوة مهمة مع محمد سامي ومش هغير رأيي".

وتابعت: "وأحسن حاجة يكون الواحد قادر يكون عارف قيمة نفسه وعارف إنه ما ينفعش يكون له بديل، ومنة أكيد لو قالت كده فمش قصدها ومش عاوزة أظلم حد، لأننا اتعلمنا نحترم بعض".

وتحدثت وفاء عن شائعة إنجابها لشقيقتها الفنانة آيتن عامر، معلقة: "كنت في تانية ثانوي وفيه حاجة اسمها كمبيوتر واللي هيزور حاجة هيروح في ستين داهية، ومش عارفة الشائعة دي كان هدفها غيرة ولا إيه؟ ده أنا لما بكون وسط مجموعة برفض الكلام على الناس وبرفض أن حد يشتم على حد".

وتابعت: "والحمد لله فيه ناس كتير بتدافع عني واللي بيكرهوا شوية صغيرين خليهم يمشوا يدوسوا على ضلي.. وتعيش يا ضلي وتكعبل الناس، وتعيشي يا ضحكتي وتفرسي كتير، دلوقتي مش بزعل وزمان كنت بزعل واكتئب".

ولم تستطع عامر، تمالك دموعها على الهواء، عند حديثها عن زوجها المنتج محمد فوزي، مشيرة إلى أنها تحزن عندما تشعر أن زوجها لم يشتق لها.

وقالت: "بزعل لما جوزي يتأخر عليا وما أوحشهوش أو أحس إنه مش شايفني، ولما يبطل يشوفني، لإن الراجل لما يشوف مراته طول الوقت، وكأن مفيش غيرها وبيكون عاوز يبسطها ويقول لها كلمة حلوة بيفرق معاها".

وواصلت حديثها: "لو وزنتي كنوز العالم قصاد الكلمة الحلوة، الكلمة الحلوة ترجح، ولما يقول لها وحشيتني وهو لسه نازل من البيت، وأنا بحب أي علاقة حلوة بين اتنين، علشان كده بارقي أي اتنين بيحبوا بعض وبنصحهم علشان ما يتحسدوش لإني بخاف على العلاقات الحلوة".

وأوضحت عامر أن سر استمرار زواجها لـ22 عاما، هو أنها لا تفشي حياتها الخاصة لأي شخص، وتتعمد الكتمان.

وأضافت: "كلمة السر في استمرار زواجي إن ما حدش بيعرف حاجة عن مشاكلي مع جوزي، ومفيش حد مش بيتخانق والحياة مش وردي مع كل الناس ولكن الأهم إنها ما تطلعش بره البيت".

وأكدت عامر أنها كانت تتجه بشكل دائم لمراقبة هاتف زوجها ومعرفة تصرفاته وتحركاته من خلاله، لكنها ابتعدت عن هذا التصرف، عندما علمت أن الدين الإسلامي يحرم ذلك ولا يحبذه، معلقة: "فيه آية بتقول: يا أيها الذين آمنوا لا تسألوا عن أشياء إن تبدَ لكم تسؤكم".

ووجهت نصيحة للنساء بالابتعاد عن "النكد": "ليه تنكشي على النكد؟ أنت ممكن تروحي للمأذون بسبب رسالة، ليه مثلا أقول له جارتنا وهي طالعة لما قالت لك إزيك ليه رديت بابتسامة؟ الراجل مش بيحب الست الزنانة".

ودافعت عامر خلال لقائها عن الإعلامية ياسمين عز، مشددة على أنها ليست ضد المرأة، لكنها تنصحها لاستمرار زواجها، مضيفة: "ياسمين عز مش ضد المرأة، هي مع العمار وإن البيت يتبني، ومع الست طويلة البال".

وأضافت: "الست خُلقت من ضلع الراجل، قريب من القلب، وربنا كان قادر يخلق الست من رجل الراجل علشان يدوس عليها، وياسمين عز مع إن الست لما تحترم الراجل أكيد هو هيحبها، ولما يكون لها ملك أكيد يستحق ملكة، ولما يكون أمير يستحق أميرة".

وتابعت: "هنفضل نبني ونقول للست إزاي تعامل جوزها وتحتضنه، الراجل له قوامه في كل حاجة، شجاعته وإحساسه بالمسؤولية وإنفاقه كل ده قوامة".