کیم جۆنگ ئون هەموو هەوڵێک دەدات بۆ کۆنترۆڵکردنی گەنجانی کۆریای باکوور

کۆریای باکوور - ئاژانسی هەواڵی ئەخباری

لە کۆریای باکوور، سەرکردە کیم جۆنگ ئون هەنگاوی نوێ هەڵدەگرێت بۆ ئەوەی گەنجان لەژێر کۆنترۆڵدا بهێڵێتەوە و ڕێگە نەدات کاریگەری کولتوورە بیانییەکان، وەک هۆلیوود و مۆسیقای کەی-پۆپی کۆریای باشوور، لەسەریان هەبێت. یەکێک لەو هەنگاوانەی کە جێگای سەرنجە، بانگهێشتکردنی ٣٠٠ هەزار گەنجی تەمەن ١٥ بۆ ٢٥ ساڵە، کە بە "تیپی شۆک" ناودەبرێن، بۆ بەشداریکردن لە پڕۆسەی نۆژەنکردنەوەی ئەو ناوچانەی بە لافاو زیانیان بەرکەوتووە. ئەم هەنگاوە چەند ئامانجێکی هەیە: یەکەم، نۆژەنکردنەوەی ئەو زیانانەیە کە لافاوەکە گەیاندوویەتی. دووەم، گەنجان بخاتە ژێر چاودێری و کاری ڕێکخراو، بۆ ئەوەی لە کاریگەرییە کولتوورییە بیانییەکان دوور بن. سێیەم، پەرەپێدانی هەستی نیشتمانپەروەری و پابەندبوون بە ڕێبازەکانی حکومەت. حکومەتی کۆریای باکوور بەردەوام نیگەرانی خۆی لەبارەی بڵاوبوونەوەی کولتوورە بیانییەکان دەربڕیوە، چونکە پێی وایە ئەم کولتوورانە هەڕەشەن بۆ سەر یەکپارچەیی کۆمەڵایەتی و ئایدیۆلۆژی وڵات.

ڕێکخستنی ئەم جۆرە پڕۆژانە بە بەشداری گەنجان، ڕێگایەکی نوێ نییە لە کۆریای باکوور. پێشتر حکومەت گەنجانی ڕێکخستووە بۆ پڕۆژە گەورەکانی دیکەی نیشتمانی. بەم شێوەیە، حکومەت هەوڵ دەدات گەنجان لە ڕێگەی کارکردنی هاوبەش و خزمەتکردنی وڵات، هەست بە گرنگی خۆیان بکەن و لە هەمان کاتدا پابەندبوونیان بە سیستەمەکە زیاتر بکات. ئەم ستراتیژییە، یارمەتیدەرە بۆ پاراستنی گەنجان لەو زانیاری و کلتورانەی کە حکومەت بە زیانبەخش یان هەڕەشەکار دادەنێت بۆ سەر سەقامگیری وڵات و یەکڕیزی نەتەوەیی.

ئاژانسی هەواڵی ئەخباری