سەرۆکی شارەوانی ئەسینا: پایتەخت ناتوانێت وەک هۆتێلێکی گەورە کاربکات

یۆنان — ئاژانسی هەواڵی ئەخباری

هاریس دوکاس، سەرۆکی شارەوانی ئەسینا، هۆشداری توندی داوە لەبارەی کاریگەرییەکانی گەشتیاریی زۆر لەسەر پایتەختی یۆنان. ئەو ڕایگەیاندووە کە ئەسینا، بە حەوت سەد هەزار دانیشتووان و هەشت ملیۆن گەشتیار لە ساڵێکدا، ناتوانێت وەک "هۆتێلێکی زەبەلاح" کاربکات. دوکاس دەڵێت گەڕەکە مێژووییەکان لە مەترسی لەدەستدانی ڕەسەنایەتی دان و دانیشتووان بەهۆی بەرزبوونەوەی کرێی خانووەوە ناچارن ماڵەکانیان جێبهێڵن. ژێرخانی شارەکەش لەژێر گوشارێکی زۆردایە و پێویستی بە پەرەپێدانی بەرفراوان هەیە.

بۆ ڕووبەڕووبوونەوەی ئەم قەرەباڵغییە، سەرۆکی شارەوانی دوکاس پلانی هەیە پڕۆژە یاسایەکی تایبەت بە بەکارهێنانی زەوی گەشتیاری بەکاربهێنێت بۆ قەدەغەکردنی چالاکییە بازرگانییە نوێیەکان لە ناوەندی مێژوویی، بەتایبەت لە گەڕەکی پلاکا. ئەمە قەدەغەکردنی کرێی کورتخایەن، شوقەی خزمەتگوزاری و هۆتێلی نوێ دەگرێتەوە. دوکاس پێشنیاری ڕاگرتنی مۆڵەتی دروستکردنی هۆتێلی نوێشی کردووە و داوای لە وەبەرهێنەران کردووە ڕوو بکەنە ناوچە کەم قەرەباڵغەکانی دیکەی پایتەخت. جێی سەرنجە، ئەو پشتیوانی لە سەرۆکی کۆمەڵەی خاوەن هۆتێلەکان، ئیڤجینیۆس ڤاسیلیۆس، وەرگرت کە ئەویش سنووردارکردنی دروستکردنی هۆتێلی نوێی بە پێویست زانی و شاری بەرشەلۆنەی وەک نموونە هێنایەوە.