ئەستێرەی چێڵسی ئینزۆ فێرناندێز، دوای داواکاری ڕیال مەدرید، کێشەکانی چارەسەر کرد

ئه‌رجه‌نتین - ئاژانسی هەواڵی ئەخباری

ئەستێرەی ئەرجەنتینی یانەی چێڵسی، ئینزۆ فێرناندێز، لە هەوڵی چارەسەرکردنی ناکۆکییەکانیەتی لەگەڵ بەڕێوەبەرایەتی یانەکەی دوای ئەوەی بە ئاشکرا ڕایگەیاند کە ئارەزوو دەکات ڕۆژێک لە یانەی ڕیال مەدرید یاری بکات. ئەم لێدوانانە ناڕەزایەتی زۆری لەنێو هاندەران و بەرپرسانی چێڵسیدا دروستکردبوو. بەپێی ڕاپۆرتێکی ڕۆژنامەی موندۆ دیپۆرتیڤۆی ئیسپانی، خاڤێر ئیستۆری، کە بەڕێوەبەری کارەکانی فێرناندێزە، ڕایگەیاندووە کە کێشەکەیان لەگەڵ یانەکە چارەسەر کردووە.

ئیستۆری وتی: "ئێمە لەگەڵ چێڵسی ڕێککەوتووین و دوێنێ کێشەکەمان چارەسەر کرد. هیچ کاتێک کێشە نەبووە. ئێمە ڕوونکردنەوەمان داوە، لێدوانەکانی ئەو مەبەستی دروستکردنی کێشە نەبووە لە چێڵسی. ئەو یەکێکە لە ڕابەرانی یانەکە." نرخی بازاڕی ئەم یاریزانە گەنجە کە تەمەنی 25 ساڵە، نزیکەی 90 ملیۆن یۆرۆیە، و لە داهاتوودا دەردەکەوێت کە ئاراستەی نوێی چی دەبێت ئەگەر چێڵسی جێبهێڵێت. فێرناندێز 161 یاری بۆ چێڵسی کردووە، 28 گۆڵی تۆمارکردووە و 29 گۆڵیشی دروستکردووە، گرێبەستەکەی تا حوزەیرانی 2032 بەردەوام دەبێت.

ئاژانسی هەواڵی ئەخباری